Sefydlwyd y Pwyllgor Newid Hinsawdd, yr Amgylchedd a Seilwaith gan y Senedd i edrych ar bolisi a deddfwriaeth, ac i ddwyn Llywodraeth Cymru i gyfrif mewn meysydd penodol. Mae’r meysydd hyn yn cynnwys polisi newid hinsawdd, yr amgylchedd, ynni, cynllunio, trafnidiaeth; a chysylltedd.
Mae'r Pwyllgor yn lansio Maes o Ddiddordeb Ymchwil i gefnogi ei waith ar y Bil Llywodraethu Amgylcheddol, Egwyddorion Amgylcheddol a Thargedau Bioamrywiaeth arfaethedig. Mae’n ceisio arbenigedd ac ymchwil ar bob agwedd ar y Bil. Rhagflaenir y Bil gan Bapur Gwyn Llywodraeth Cymru sy’n amlinellu’r meysydd y mae’r Bil yn debygol o’u cynnwys.
Disgwylir i’r Bil wneud y canlynol:
- sefydlu corff llywodraethiant amgylcheddol parhaol i sicrhau bod awdurdodau cyhoeddus yn cynnal cyfraith amgylcheddol;
- cyflwyno egwyddorion amgylcheddol trosfwaol i fod yn sail i bob penderfyniad polisi yn y dyfodol;
- cyflwyno fframwaith i ddiogelu ac adfer natur, gan gynnwys targedau bioamrywiaeth.
Mae gan y Pwyllgor ddiddordeb penodol yn y canlynol:
- Y broses o sefydlu a chylch gwaith cyrff llywodraethu amgylcheddol eraill y DU, a gwersi a ddysgwyd;
- Adeiladu ar ei wybodaeth bresennol a gwaith ar dargedau bioamrywiaeth; a
- Datblygu sylfaen dystiolaeth i lywio ei asesiad o'r egwyddorion amgylcheddol sydd wedi’u cynnwys yn y Bil.
Anogir academyddion ar bob cam o’u gyrfa, sefydliadau ymchwil, ac arbenigwyr i gofrestru eu diddordeb yn y Maes hwn o Ddiddordeb Ymchwil, ychwanegu eu gwaith ymchwil presennol ac unrhyw waith ymchwil arfaethedig yn y meysydd pwnc hyn i gronfa’r Meysydd o Ddiddordeb Ymchwil, a chynnig cwestiynau y gallai’r Pwyllgor eu gofyn i Lywodraeth Cymru yn y byrdymor, y tymor canolig a’r hirdymor.
Gall y Pwyllgor ddefnyddio’r wybodaeth a ddarperir gennych i lywio ei ddull o graffu ar y Bil a’i gwestiynau i Lywodraeth Cymru a thystion eraill. Gall Ymchwil y Senedd hefyd ddefnyddio’r wybodaeth i lywio cymorth ymchwil i’r pwyllgor.
chevron_right
